बेरोजगार मराठा तरूणांना अण्णासाहेब पाटील आर्थिक विकास महामंडळांतर्गत बिनव्याजी कर्ज मंजूर करून वितरणासाठी बँकांना सक्ती करा

अंबाजोगाई (प्रतिनिधी)

अंबाजोगाई तालुक्यतील सुशिक्षित बेरोजगार मराठा तरूणांना अण्णासाहेब पाटील आर्थिक विकास महामंडळा अंतर्गत १० लाखापर्यंत बिनव्याजी कर्ज मंजूर करून, सदरचे कर्ज वितरण करणेसाठी बँकांना सक्ती करण्यात यावी, तसेच सर्व बँकेतील टार्गेट पैकी कर्जवाटप केलेली यादी जाहीर करावी याप्रमुख मागणीचे निवेदन अखिल भारतीय मराठा महासंघाच्या वतीने उपजिल्हाधिकाऱ्यांना मंगळवार, दि.२१ मार्च रोजी देण्यात आले.

सदरील निवेदनात नमूद करण्यात आले आहे की, शासनाने सुशिक्षित बेरोजगार मराठा तरूणांना रोजगार उपलब्ध व्हावा म्हणून अण्णासाहेब पाटील आर्थिक विकास महामंडळा अंतर्गत रूपये १० लाखापर्यंत बिनव्याजी कर्ज मंजूर करावे, अण्णासाहेब पाटील आर्थिक विकास मंडळाचे अध्यक्ष मा.नरेंद्रजी अण्णासाहेब पाटील यांनी जाहीर केलेल्या अध्यादेशाद्वारे बँकांना कर्ज वाटपाचे आदेश प्रत्येक बँकेला टार्गेट प्रमाणे जारी केलेले ही आहेत. तरी या अनुषंगाने सुशिक्षित बेरोजगार मराठा तरूण बांधव मोठ्या प्रमाणात ऑनलाईन फॉर्म भरून घेत आहेत. व फाईल बँकेत जमा करीत आहेत. परंतु, मागील तीन ते चार महिन्यांपासून बँकेत सतत चकरा मारून त्रस्त झाले आहेत. पण, काही बँक मॅनेजर फाईल मंजूर करण्यास विनाकारण जाचक अटी व नियम लागू करून टाळाटाळ करीत आहेत. कर्ज वितरण प्रकरणात कसला ही प्रतिसाद दिसून येत नाही. या उलट मराठा समाजाला जाणीवपूर्वक त्रास दिला जात आहे. ज्या नियम व अटी या कर्ज प्रकरणात लागत नाहीत. त्या जाणीवपूर्वक लावून मराठा समाज बांधवांना आर्थिक व मानसिक त्रास दिला जात आहे. मराठा समाजावर हा एक प्रकारे मोठा अन्याय होत आहे. काही बँकेत तर टार्गेट संपले असे जाहीर ही केले जात आहे. बहुतांशी बँकेत एक ही फाईल मंजूर केलेकी दिसत नाही. तरी सन्माननिय साहेबांनी बँकांना कर्ज मंजुरी सक्तीची करावी व अनावश्यक जाचक अटी लागू करू नये असे आदेश सर्व बँक मॅनेजर यांना द्यावेत. तसेच प्रत्येक बँकेला टार्गेट किती दिले व त्यापैकी आज दि.२१/०३/२०२३ या तारखेपर्यंत किती कर्ज फाईल मंजूर करून दिल्या याची यादी प्रत्येक बँकेने त्यांच्या प्रत्येक शाखेत दर्शनी भागात लावावी. जेणेकरून अर्जदार मराठा समाज बांधवांना याची माहिती व्हावी. अशी सहकार्याची अपेक्षा निवेदनातून व्यक्त करून अन्यथा याप्रश्नी लोकशाही मार्गाने आंदोलन करण्यात येईल असा इशारा देण्यात आला आहे. सदरील निवेदनाची प्रत महितीस्तव अंबाजोगाई मधील सर्व राष्ट्रीयकृत व सहकारी बँका यांना देण्यात येत आहे. निवेदनावर अखिल भारतीय मराठा महासंघाचे जिल्हाध्यक्ष राणा चव्हाण, एॅड.माधव जाधव, एॅड.संतोष लोमटे, एॅड.प्रशांत शिंदे, मराठा महासंघाचे प्रसिद्धीप्रमुख
पत्रकार रणजित डांगे, गोविंद पोतंगले, प्रशांत आदनाक, प्रकाश बोरगावकर, शिवाजी देशमुख, महेश आंबाड, राहूल कापसे, मयूर रणखांब, प्रा.भास्कर निर्मळ, प्रा.विजयकुमार गंगणे, संभाजी वाळवटे, पांडुरंग देशमुख, बापू इंगळे, सुनिल मस्के, प्रशांत चव्हाण, प्रा.एस.बी.इंगळे, एॅड.जे.जी.पवार, बालासाहेब नेमाणे, ॠषिकेष कडभाने, एॅड.ए.व्ही.धायगुडे यांच्यासह इतरांच्या स्वाक्षऱ्या आहेत.